】作為米線控，我哋每星期真係最少食一次米線㗎！除咗嗰幾間連鎖店之外，其實唔同地區都有好多米線小店。話說半年前，有新蒲崗嘅粉絲就推介呢間雲南人家風味餐廳，但我哋每次都黑氣石纏身，第一次就東主有喜，第二次係我哋無check清楚，遇着例假休息，最後終於喺無心插柳情況下，食到雲南人家風味餐廳喇！
A姐選擇：豬扒、鮮冬菇、唐生菜麻辣米線
其實雲南人家風味餐廳最出名嘅係豆花撈米線，不過我哋偏向湯米線多啲，所以就叫咗呢個選擇。任選三個餸，價錢都係四十零蚊，真係夠晒抵食。上枱第一時間就梗係試吓個湯先啦，我選擇嘅係小辣，辣度唔強，反而更突出麻香嘅層次。至於配料方面，分量十足，豬扒一大塊，夠晒軟腍；至於冬菇同生菜都夠新鮮，勁掛湯。
M佬選擇：雞扒、滑牛肉、滷水雞翼酸辣米線
講到呢個米線，我哋最欣賞就係用鐵鍋上枱，令到米線保持住熱辣辣，夠熱嘅米線真係會更加好味㗎！呢碗米線嘅份量好多，就算好似M佬咁大食，都覺得勁滿足！至於湯底就揀咗酸辣，酸同辣嘅比例啱啱好，湯入邊仲有啲豬肉碎，令味道更加濃郁。配料方面同樣勁豐富，雞扒大塊嫩滑；滷水雞翼勁入味；而滑牛肉嘅肉質滑嫩。整體來講，非常啱我哋嘅口味！
