近排公司好忙，所以A姐投訴好耐無二人世界喇！趁手頭上嘅Project終於完成，即刻要實行餵飽A姐嘅Project B，要氹佢當然有一連串計劃，第一站就帶佢去到深水埗一間價錢比較親民嘅Project B，嚟一個反高潮啦！其實Project B環境十分都幾清幽又有情調，都幾適合情侶拍拖㗎！
忌廉松露蘑菇湯
作為前菜嘅忌廉湯入口好滑，每啖都帶有松露同蘑菇香味，非常creamy。
香草忌廉紐西蘭青口
青口十分肥大肉厚，加上洋蔥同忌廉作調味，將青口嘅鮮甜味大大提升。身為海鮮控嘅我真係可以輕輕鬆鬆清曬一盤啦！
馬沙拉美國肉眼扒
肉眼我地嗌咗medium rare，牛扒嘅生熟度啱啱好，肉質軟腍，肉味濃郁，值得推介！另外，相信好多人食扒都淨係留意塊扒煎得靚唔靚，其實配菜都好重要，因為配菜嘅存在可以減少油膩感亦可增加飽肚感。馬沙拉美國肉眼扒嘅配菜就有羽衣甘藍同粗薯條。羽衣甘藍用咗少少鹽花作調味，食落十分爽口；配上脆卜卜嘅粗薯條，簡直食唔停口。
煙三文魚黑松露忌廉意大利飯
作為飯桶嘅A姐，梗係唔少得要嗌個飯食下。呢個意大利飯軟硬適中，配上香濃忌廉同煙三文魚，好creamy，A姐表示十分滿意。
