藝術館翻新完重開,其中一大焦點就係一間新開嘅澳洲餐廳,坐擁住維港海景,環境闊落,仲要由師承澳洲知名星級廚師Mark Best 嘅澳籍行政總廚Anthony Hammel主理,靚景配美食,同朋友聚會一流!
佔地5,000平方尺,以天際線美景為背景餐廳設有130個座位,全場設有巨型玻璃窗,大家用餐時可以嘆維港靚景。
用餐區以森林綠同蜂蜜色作為裝飾主調,簡潔得嚟又有藝術感!
Hue提供新派嘅凱撒沙律,喺新鮮生菜放上西班牙白鯷魚、經蘋果木煙燻碎蛋同脆煙肉碎,最後塗上 Vadouvan 香料醬。
前菜有紅菜頭沙律配羊奶芝士同煙燻鰻魚。
西班牙Carabinero紅蝦配以煙燻魚子奶油醬汁,食法係將蝦頭沾上奶油醬汁再享用。
自家製意大利馬鈴薯丸子放入意大利水牛芝士作餡料,再以西蘭花苗同西蘭花苗蓉放底,佐以煙燻榛子同焦化牛油醬,陣陣濃郁牛油焦香,味道香濃。
甜品都相當有質素,當中有法式酸忌廉慕絲配新鮮紅桑子、大黃同自家製伯爵茶雪糕。
仲有必食嘅經典72% 黑朱古力撻配雲尼拿忌廉同榛子朱古力醬。