同親戚或者朋友聚會，一大班人一齊嘅時候成日嚟嚟去去都係打邊爐，再唔係就係去酒樓嗌餸食飯，食到厭之餘，有時真係心諗： 「同我屋企食嗰啲差唔多囉！」不過，因為真係諗唔到一大班人可以去邊食，所以通常都唔會出聲ban 話唔想食嘅，廢事剩係識破壞但無啲建設！不過小編最近就食咗間位於九龍城嘅私房菜，真係啱哂一大班聚會慢慢傾計、品嚐美食。雖然都係以中菜為主 ，但敢肯定嘅係，應該無咩人屋企會煮呢啲，步驟繁複得嚟好難整得好味。不過話哂呢間私房菜係由擔任過新鴻基家族御廚嘅胡漢榮打理，富豪御用㗎喎，味道當然有保証！唔講咁多，即刻俾大家睇下呢個私房菜到底有咩食喇！
樂活松子魚 – 酸酸甜甜，外層炸到脆卜卜，入面魚肉滑捋捋！
泰式木瓜柚子蝦沙律 – 唔好睇佢個樣咁似普通青木瓜沙律，其實佢用咗秘制醬汁，無泰國嗰啲咁辣，但都惹味開胃！
上湯焗龍蝦 – 聽主廚講係特別挑選8-12両嘅本地龍蝦，蛋白質含量高啲，而脂肪含量就低啲，食落肉質細嫩！
樂活佛跳牆 – 用咗多種名貴山珍同海味，有鮑魚、花膠、冬菇、乾瑤柱等等，相當足料，湯清而且膠濃。
椒鹽南非鮑伴奇脆豆腐 – 鹹鹹哋、香香哋嘅椒鹽南非鮑，唔好以為炸嘢一定搵啲無咁新鮮嘅材料，超樣拎靚嘢出嚟炸啊！
XO醬爆蟶子皇 – 呢個炒得相當入味，重口味朋友啱哂，蟶子皇份量好多！
玉簪星斑球 – 斑球微微煎香過，好香口！
小炒王配紫米鍋巴 – 連小炒王都整到咁鬼靚！
高湯雲腿津白
蟹皇炒飯 – 你無睇錯啊，係有蟹膏喺入面㗎！
冰雪開心果 – 一上枱忍唔住「嘩」一聲！生果盤都擺到咁浮誇！成枱即刻拎住手機狂影！
小編當日係食咗「套餐D」，另外原來仲有三個套餐可以揀嘅。想食好嘢嘅就要早啲book 啊，三日前就要book 好喇！
