同屋企人聚餐，中菜一直都係最好嘅選擇！位於灣仔嘅中華小館，門面看似無咩特別，但內裡充滿乾坤。中華小館內飾用上唔少實木原素，充滿懷舊傳統中國風；至於餐牌亦花足心思，出品高質，讓我哋可以細味一下粵式手工菜。
紅燒乳鴿
燒過嘅乳鴿外皮香脆，咬開乳鴿外皮之後，肉味伴隨住肉汁蜂擁而出。醬料除左由細食到大嘅淮鹽，中華小館仲另外提供咗喼汁，酸酸哋之中帶有微甜嘅味道，無諗過原來喼汁同乳鴿都match。
陳皮梅一字骨
用砂煲爆炒過嘅一字骨香味四溢，味道帶有陣陣嘅陳皮香同焦香，酸甜中和咗排骨嘅油膩，特別開胃。
瑤柱貴妃雞
用上瑤柱同雞湯浸煮過嘅貴妃雞，皮滑肉嫩，而且鮮味得以提升，食落仲有瑤柱香嘅層次。
