又一個活化嘅項目誕生喇！今次我哋就嚟到位於旺角嘅618上海街，呢個文青商場由過百年嘅唐樓活化而成，其中10幢更加係被評為二級歷史建築，建於戰前嘅騎樓式唐樓。活化後嘅618上海街保留咗舊香港嘅味道，同時亦引入多間特色小店同餐廳，其中位於地下嘅文青市集就最吸引我哋喇！
二級歷史建築
市建局喺2008年展開上海街保育活化計劃，將10幢建於20年代嘅戰前騎樓式唐樓，以及支撐騎樓嘅13條麻石柱保留，並活化重現於大家眼前，而我哋更可以喺麻石柱上嘅廣告招牌了解呢度嘅過去。原來上海街曾經係裝修用料嘅集中地，呢度售賣裝修建材、燈飾、磁磚、地板等物料。
618上海街
活化後嘅618上海街，一共有 5 層。除咗最左邊嘅唐樓盡量保持原貌之外，右邊嘅外牆完美翻新，而中間兩幢更改裝咗玻璃幕牆，其實我哋覺得有種格格不入嘅感覺，或者建築師想展現由舊至新嘅觀感吧！
商店簡介
喺618上海街除咗地下嘅文青市集，仲有好多特色嘅文青小店，包括人氣古著店美華氏、懷舊雜貨集中地嘅文化屋雑貨店、日本台灣古道具嘅常常集品、文化保育小店REstore等等，如果細心慢遊，可能會搵到心頭好呢！
