香港喺1841年開埠至今，有唔少具歷史嘅建築物可能一早被拆除，而保留至今嘅通常都會被列為香港法定古蹟，不過，舊筆架山隧道就被大家遺忘喇。今日我哋就尋找香港嘅鐵路歷史，嚟到舊筆架山隧道嘅九龍塘入口，無論係鐵路迷定係鍾意打卡嘅朋友都唔可以錯過。
舊筆架山隧道 | 提提你
1. 請勿攀爬及進入圍欄內嘅鐵路範圍
2. 記住保持環境清潔，自己垃圾自己帶走
3. 愛惜古蹟，絕對唔可以破壞文物
舊筆架山隧道 | 前往舊筆架山隧道九龍塘入口方法
1. 喺九龍塘港鐵站F出口，沿根德道往歌和老街方向，行大概10分鐘就到
舊筆架山隧道 | 舊筆架山隧道（煙墩山隧道）
舊筆架山隧道 | 隧道喺1910年啟用，全長2.4公里，闊5.2米，因應當其時嘅成本效益，隧道採用單軌雙程行車。連接九廣鐵路嘅九龍同新界兩段嘅舊筆架山隧道，係當時全亞洲最龐大嘅工程之一，亦為香港最長嘅隧道。
直至1981年，為配合九廣鐵路電氣化同現代化工程，全身嘅筆架山隧道啟用，而呢條舊嘅筆架山隧道曾被研究改建為行車隧道，以紓緩獅子山隧道擠塞問題，但因為隧道經歷二戰時候嘅損壞，加上沒有消防及逃生等設備，最終加建輸送管道輸送煤氣同天然氣。
呢條舊筆架山隧道靜靜地被活化，但並未列入香港法定古蹟及任何歷史價值評級，至於隧道入口嘅花崗岩磚牆就完美保留，上面仍清楚睇到隧道名稱「Beacon Hill Tunnel」、施工同竣工年份（1906、1910）。另外，近期可能睇得太多喪屍片，所以嚟到呢個入口，總有一種凄美嘅喪屍電影感覺呢，哈哈！
