位於尖沙咀嘅公園，我估你諗都唔使諗就會答：九龍公園。如果叫你諗兩諗再答，可能會答：尖東市政局百周年紀念花園。但今日要介紹嘅係經常被遺忘嘅訊號山花園！訊號山花園除咗適合大家休憩之外，公園內仲有兩個充滿殖民時期嘅打卡熱點㗎！
訊號山花園
訊號山花園嘅入口位於K11同棉登徑旁邊，係我哋經常會行過，但又總會被忽略嘅一個地方。而話明係一座山，又點少得一條大斜路呢！由公園入口上去訊號塔，大概行4分鐘斜路就到訊號山山頂。
辦事處
前往訊號塔途中，就會經過呢個充滿歐陸風格嘅辦事處，係大家第一個嘅打卡熱點。
訊號塔
1907年建成嘅訊號塔原本樓高兩層，高12.8米。直至1927年，為咗讓船隻更清楚睇到訊號塔，所以加建至三層，高18.9米。訊號塔嘅建築風格帶有古典巴洛克色彩同愛德華式裝飾特色，以紅磚配上淺色石組成。據說當年訊號塔就負責向維多利亞港船隻報時同掛起颱風風球訊號。但隨住尖沙咀填海，加上船隻多數運用電報通訊，喺1933年6月30日天文台就停用訊號塔。後嚟就發展同活化成為訊號山花園，而訊號塔就喺2015年10月23日被列為法定古蹟。
