日本疫後重開 南韓人兩小時搶光日本旅遊團

香港人有幾鍾意日本，相信唔需要多講，不過原來日本鄰居南韓人都係極度崇日呢！大家都知日本將於6月10日開始開放外國旅行團入境，每日入境人數提高至2萬人，而且免嚴格隔離措施。

南韓人一直喜歡去日本，距離近方便又快捷，因此南韓各大旅遊社已經開始推出赴日旅行團Package，據各旅行社所講，反應遠超預期，1,300多個大阪團推出短短兩小時就極速訂滿！目前南韓人去日本需要簽證，主要原因係2020年3月日本防疫令，暫停多國包括南韓免入境簽證，加上早於2019年5月未有疫情前，日韓因外交關係惡化令入境日本嘅南韓旅客大減。換而言之，南韓人已經近3年無去日本旅行，難怪咁「餓」。南韓旅遊業界表示，一旦恢復免簽證，相信更會刺激南韓人入境日本呢。