「我認罪喇，我偷食咗你包黑松露薯片！」M佬所犯嘅罪真係罪大惡極，我排咗成個鐘先買到㗎，絕對要接受懲罰！所以我就帶佢去到位於粉嶺嘅前裁判法院接受審判，最終我判佢幫我喺呢個充滿歷史性嘅大樓瘋狂影相打卡啦！
提提你
1. 設有免費導賞團，可以即場參加，了解法院嘅歷史
法院大樓
大樓建於1960年，樓高2層，充滿殖民地新古典主義建築色彩。大樓內設有兩個法庭，初時主要審判新界區內以家事為主嘅法律糾紛。直至2002年，因設施不足以應付法庭運作而遷往旁邊新建嘅法院大樓。至2010年被古物古蹟辦事處列為香港三級歷史建築，並活化為香港青年協會領袖學院。
中庭大堂樓梯
一踏入大樓就會被中庭大堂樓梯吸引，呢度絕對係影相打卡嘅熱點。樓梯以馬賽克瓷磚、人造石磚同水磨石磚建成，加上天井引入自然光線，影相好靚㗎。
法院繳費處
繳費處嘅其中一個用途為向市民收取罰款，而繳費處內亦設有一座完整保留嘅夾萬，儲存法院重要文件、證物等。
二號法庭
一號法庭已改建為香港青年協會領袖學院嘅會議室，而二號法庭就保留昔日原貌，包括法官席、犯人欄、律師、證人、公眾、記者席等設施。
裁判官辦公室
為怕潮濕而影響原有嘅傢俬，所以裁判官辦公室內嘅工作檯已搬走。而辦公室內現只放有一部電視，播放市民口述裁判法院嘅歷史。
裁判官走廊
為使裁判官嘅裁決公正公義，所以專設走廊避開市民、記者、律師、犯人家屬等騷擾。
囚車車房入口
所有犯人都係無罪假定，所以為保障犯人，設有專屬嘅囚車車房同樓梯往返法庭。
拘留室
裁判法院內設4間拘留室，其中一間原屬女性拘留室保留原貌，開放予公眾參觀；而另外3間改裝成多用途活動室。
