香港雖然無荷蘭式風車,但就有期間限定嘅荷蘭式花海喇!今日我哋行萬宜水庫東壩嘅時候,就順便嚟到位於西貢嘅隱世村莊 – 白腊村。雖然白腊村嘅荷蘭式花海係期間限定,不過,呢度都有啱晒打卡嘅彩色屋仔,加上仲有一間臨海士多,啱晒行麥里浩徑一段(萬宜水庫段)嘅時候作中段休息補給啦!

前往方法
巴士:於港鐵鑽石山站或西貢市中心坐九巴96R至北潭涌落車,再轉乘的士前往
街渡:於西貢碼頭搭45分鐘船,即可到達,但船費則以人數由船主釐定

提提你
1. 旁邊就係附近居民居住嘅地方,所以大家遊玩參觀嘅時候,記住保持寧靜
2. 大家記住保持環境清潔,自己垃圾自己帶走
3. 白腊村蚊蟲眾多,應做足防蚊措施

〈好遊〉露營賞花打卡秘景 西貢隱世白腊村

白腊村
位於西貢嘅白腊村係一條超過三百年歷史嘅客家村莊,由於白腊村嘅交通唔方便,所以非常隱秘。但近年村民將村落翻新,加上種植多個品種嘅鬱金香,吸引咗唔少遊客,令白腊村變成人氣景點。

白腊村花海
白腊村之所以為人熟悉,全因為每年3月嘅鬱金香花海!村民會種植多種色彩繽紛嘅鬱金香,令白腊村花海成為一個打卡嘅熱點!但有唔少遊客就反映,鬱金香花田對外宣稱係免費參觀,但入到嚟之後就發現需要收取入場費而大失預算。不過,我哋今日嚟到,由於唔係鬱金香花海嘅季節,加上只有少少嘅小黃花,所以就未有收取入場費喇!

〈好遊〉露營賞花打卡秘景 西貢隱世白腊村
〈好遊〉露營賞花打卡秘景 西貢隱世白腊村

白腊村彩色小屋
花海雖然係期間限定,但入到嚟白腊村,仲有代表白腊村嘅地標:彩色小屋!近年翻新嘅時候,村民就將歷史悠久嘅客家村莊外牆油上唔同顏色,令古舊嘅村莊搖身一變,令大家彷彿置身外國嘅小鎮!呢個小鎮絕對係啱晒大家影相打卡呀!

〈好遊〉露營賞花打卡秘景 西貢隱世白腊村

白腊村海灘
冬天嘅時候,白腊村海灘會成為唔少露營朋友喜愛嘅紮營地點;至於夏天嘅白腊村海灘當然就是潛水、浮潛、游水同曬太陽嘅熱門地點啦!白腊村海灘因為水清沙幼,海景靜美,所以有港版馬爾代夫之稱。

〈好遊〉露營賞花打卡秘景 西貢隱世白腊村