聖誕節仲有兩星期就到,疫情下雖然大家未必去到外地過白色聖誕,但花啲心思好好裝飾布置家居,亦可以有濃厚節日氣氛。其中聖誕樹可以話係聖誕節嘅一個重要icon,有研究發現,喺屋企、office擺放聖誕樹,對身心有益健康。

美國有線新聞網報道,過去研究已證實多接觸自然景物,可以減輕身心壓力,放鬆緊張情緒,美國天普大學 (Temple University) 心理學家Sonja Peterson-Lewis話,將戶外綠色植物帶入室內,對人同樣有正面作用。

Image Credit: AFP
Image Credit: AFP
Image Credit: AFP
Image Credit: AFP

美國得州農工大學園藝科學學系教授Charlie Hall就鼓勵大家聖誕節擺設聖誕樹,如果真聖誕樹效果更好,因為植物可以令人精神情緒變得更包容、更有同理心,屋企有棵聖誕樹,心情自然都靚啲。Hall又建議,與親朋好友一齊揀靚靚聖誕樹,一齊布置裝飾,可以加強人與人聯繫,對心理健康有更好作用。

Image Credit: AFP
Image Credit: AFP

除咗心理健康,對身體同樣有益。常綠植物會釋放一種叫「芬多精」嘅化學物質,可以刺激體內自然殺傷細胞,對抗有害細菌等侵襲,係人體免疫系統重要部分。

大家可能會問,聖誕樹被人砍伐再搬番屋企,會唔會已經失去呢啲好處?Hall就叫大家唔使擔心,只要見到樹上針形葉係綠色,周圍有光線,聖誕樹就會繼續進行光合作用,產生新鮮氧氣,室內空氣自然清新啲!最緊要大家唔好只顧裝飾聖誕樹,記得要定時淋水!

Image Credit: AFP
Image Credit: AFP
Image Credit: AFP
Image Credit: AFP

目前聖誕樹有十幾個品種,主要係「冷杉類」常綠喬木,有清香氣味,專家話,聖誕樹味道會讓人勾起回憶,連繫同親人種種經歷。當然回憶未必係快樂往事,專家教路,選擇另一品種嘅聖誕樹,呼吸另一種聖誕樹香味,學習放手、放鬆心神,為自己創造新一段快樂記憶。

講咗咁多真聖誕樹好處,人造塑膠聖誕樹係咪一無是處?當然唔係!近年人造聖誕樹製作像真度愈來愈高,已有接近真樹所產生嘅心靈調理作用,想有真樹嘅味道?好簡單,用幼木條沾上自己鍾意嘅香油,插喺人造聖誕樹上,咁就色香味俱全,栩栩如生。